W mojih ukohanyh Uogewnikah S’loonskih uosprawiomy sie tako historyjka uo keryj godo tytuu, a kero dotyczy mojego dalszego kuzyna - Joozka Grobosza.

Jak mu byuo pora lot i umiou jurz dobrze hodzic’, uojcowie brali go ze sobom na szpacyry.

I jak przystauo na porzondno rodzina prowadziyli go za ronczki miyndzy sobom.

Ta wymuszono pozycjo, z wyciongniyntymi do goory na boki mauymi ronczkami, kero mu s’cic’ niy uodpowiadaua, abo morze tyrz to rze uon bou jurz uod mauego bardzo samodzielny, co hciou pokozas’ coukymu s’wiatu, abo morze jeszcze cos’ inkszego powodowauo, rze ciyngiym sie wyrywou swojym uojcom i uciekou do przodku.

Darymnie uoni za niym wouali: Joozik, Joozik, Joozik.

Maszyrowou twardo przed siebie i sie za siebie niy uoglondou.

Korzdy co widziou mauego synka, kery maszyruje som, a za kerym uojcowie wouajom, proobowou się niym zainteresowac’.

I abo hciou go zatrzymac’, coby go uojcowie mogli dogonic’ ,abo mu zwracou uwaga na to,
rze fwos’ za niym wouo.

A Uon ftedy uodpowiadou:

„ Jo niy je Joozik uod Groboszki ! „ ,

wzruszou ramionami i maszyrowou dali.

Coby mieć’ hoc’ troha swobody, niy przyznowou się do wuasnyh uojcoow.

Ta historio mi sie przypomniaua jak my, internetowo rodzinka, wyczekiwali na Tadzika
z Florydy, kery miou się zjawic’ w Suminie i tam z nami trefic’.

Niykerzy sie po cihu imaginowali, co morze bydzie to nasz nowy przewodnik, kery doprowadzi nos do upragnionyj s’loonskiyj wolnos’ci i kery jako Minister Spraw Zagranicznyh Republiki S’loonskiyj przywiezie jyj wzorce z Hameryki i nom uona s’leci jak przysuowiowo manna z nieba.

Nic sie takiego na razie niy stauo.

Ale som my peuni obaw uo Niego, bo do dzisioj się niy uodzywo i niy dowo znaku rzycio.

Miou przyleciec’ na naszo ziymia, a potym trefic’ na Zaolzie.

I tukej kolejne skojarzynie, z tym uo cym pisou uostatnio Kazimierz Kutz, z Janem S.

Tajymniczy w jego wyobrarzyniu, dalszym ciyngiym zakonspirowany, abo ino pod dalszom
cynzurom Jan S., jak Go uoznaczo w artykule felietonista, tyrz s’leciou na nasza ziymia, tyla
rze na spadohronie.

A bouo to w 1945 roku. Zanim Rus wloz.

Skokou coby przygotowac’ dlo niego przywitanie.

Ale zamiast zeskocyc’ na ziymia pod Tarnowskymi Goorami, trefiou pod Zawiercie.

Tyn dwakroc’ uodznaczony ruski Bohater, oficer ruskego wywiadu, wyhowanek polskego
Gimnazjum w Bytomiu, harcerz, uwczesny Hans Kloss, kery miou uodegrac’ swoja znaczonczo rola po wojnie na S’loonsku straciou się i przepod jak przysuowiowo s’liwka
w kompocie.

I ta morzliwo analogio z naszym zaginionym Tadzikym mocno mie przerazioua.

Bo i Tadzik mo jak mys’la swoja rola do uodegranio dlo S’loonska, a kero jurz zacon uodgrywac’ razym z nami.

Na szczyn’s’cie Jan S. - Jan Szwalenberg - niy musi jurz być’ zakonspirowany, bo wielu na jego tymat prowda morze nom dzisioj uopowiedziec’ bez uobawy. Hoc’by Paweł Kachel, bo z jego uojcym i ujkym Janek się kamraciou.

No hyba rze Kutz je inkszego zdanio i uwarzo rze na dekonspiracjo jeszcze niy przyszou czas? To wtedy rzeh to zacis!

Gorzi z Tadzikym, bo niy wiymy kaj Uon wylondowou, w cyjih je rynkah.

Abo ,co gorsze, czy niy godo wszystkim, kerzy Go hcom do nos zawroocic’, rze uon niy je Tadzik uod Jeczaliczki !?