W mojih ukohanyh Uogewnikah S’loonskih mieli my niy ino ciekawyh ludzi, ale i rostomajto ciekawo, mondro gadzina.

Uo przywionzaniu S’loonzokoow do swoji gadziny dugo by uosprawiac’.

Korzdy miou cos’ rzywego w doma, w hlywiku abo na fis’li.

Na fis’li nojczyn’sciyj gruhauy gouymbie. Jeszcze do dzisioj posyuo sie je na flugi na keryh
robiom poroset kilometroow. Wielu niy moguo don’s’ do tego i zrozumiec’, co im pomogo znojs’c’w droga na S’lioonsk i do uogewnickego gouymbnika.

W hlywiku moguy sie znolez’c’ kury, kacki, gynsi, krooliki, a nawet koza abowieprzek.

No a w doma to nojcyn’s’ciyj s’piywou kanarek.

Po domu hodziouy tyrz koty, a przy budzie bou uwionzany pies.

Uo an’fahowyj gadzinie Wom niy byda uosprawiac’, ale uo jednym psie, a tak doprowdy - uo suce, musza Wom uopedziec’.

Na kon’cu moji drogi, kero mo ino szes’c’ siyniow, stou kedys’ grubowy dom, w kerym miyszkali Kaczmarczyki..

Byli jurz leciywi i niykere roboty bouy jurz dlo nih za ciynrzke.
Uon hyba po pylicy, ciynrzko miou wydyhac’, a z Niom tyrz niy bouo lepi.

Ale rze jak jurz rzeh kedys’ pedziou, uogewczany mieli gowy niy uod parady, tak i stary Kaczmarczyk postarou sie uo pomocnika. Bou niym uowczarek alzacki cyli niymiecki
nazwany mianym Zynta. Niymrzeciyntnie mondro suka.

Kaczmarczyk ucou jom roorznyh rzeczy. Niy ino hodzynio przy nodze, aportowanio,
ale tyrz dowanio guosu, zostowanio, cekanio, lotanio po prostym i po shodah.
Naucou jom nawet licyc’.
Dugi cas hodzioua Zynta s’niym, wszyndzie tam, kaj Uon. Do sklepu, na szpacyr, do pywnice.
Jak szli do sklepu, to zowdy niosua w pysku pleciony koszyk w kerym przynosioua kupiony
towor.
Po jakyms’ casie somsiady uobocouy tyrz jyj psio robota za pomocnika w familoku.
Kaczmarczyk naszykowou dlo Zynty mauy kibelek z drewnianom ronczkom, z kerym uona
lotaua miyndzy pywnicom, a trzeciym sztokym, kaj miyszkali.

Nojprzod po proorznu, a potym z coroski barzyj nafolowanym wynglym kibelkym.

Kaczmarczyk w pywnicy folowou wyngel, a Kaczmarczycka wysypowaua przyniesiony
przez Zynta w kibelku wyngel do koukastle.

Po jakyms’ casie jurz sama lotaua na Moskwa do sklepu po mlyko, rzymuy, masuo
i inkszy towor.

Kaczmarczyk pisou na kartce co mo sprzedowacka naszykowac’ za towor, wkuodou jom
razym z piniyndzmi do mauego bojtlikat, szykowou jakis’ maszkyt dlo Zynty i wkoudou
to wszystko do koszycka.
Zynta leciaua z niym do sklepu, kaj dostowaua zamoowiony towor, reczta piniyndzy
i tyn naszykowany maszkyt w nagroda.
Z pounym koszykym leciaua potym do dom coby uoddac’ to wszystko Kaczmarczykom
i dostac’ drugi maszkyt.

Jak boua dobrze wyszkolono morze s’wiadcyc’ to, co przy swojyj robocie niy uoglondaua
sie na nic, ani na rzodnego.
Nawet kot ani inkszy pies niy bou w stanie jyj zeszterowac’.
Jednego razu som rzeh widziou jyj reakcjo na Neroka z naszego placu, kery cajhnujonc swoje terytorium nerwowo reagowou na Zynta kero leciaua ze sklepu na szryjk.
Szczekou na nia i nerwowo przebiyrou zadniymi nogami, coby pokozac’ swoje znaczynie
i pozycjo w tym miejscu. Probowou jom sprowokowac’ do szarpaniny.
Ale uona w swoji robocie boua zarzarto i niy reagowaua na rzodne napasztowanie.
Tym mi zaimponowaua.

Jo wtyncos miou swoja Dina, kero rzeh dostou uod kerownika gospody „Piast” w keryj robioua moja muter.
Dina miaua sie u nos dobrze, bo boua mojym i rodziny piyrszym psym, a wszystko co piyrsze
koho sie barzyj. A dodatkowo moja muterka boua jurz uod dziecka wielkom psiorkom, za co
jom wszystke psy instynktownie kohauy i sie do niyj uasiouy.
Rzodyn pies nigdy na nia niy zaszczekou. Cuy dobrego cowieka.

Jak umarua Kaczmarczycka i zestarzou sie jeszcze barzyj Kaczmarczyk, wielakroc’
przyhodziou do nos z propozycjom, coby my wziynli do siebie Zynta, bo cuu i wiedziou rze miaua by sie u nos dobrze.

Hciou - coby sie dostaua w dobre rynce!

Take staranie mo wielu uo TO, co je im bliske, kohane i co by hcieli uostawic’ po sobie inkszym pod uopiekom.

Wspominom niyprzeciyntnie mondro Zynta, a morze ino perfekcyjnie wytresowano,
ale mom na mys’li cos’ niypomiernie warzniejszego.

Nasz S’loonsk i nasza s’loonsko mowa!

Coby sie dostauy w dobre rence!

Przyhodzom do dom piyrsze materiauy uo kandydatah do Sejmu i Synatu.

Kerzy z nih majom te dobre rynce?