W mojih ukohanyh Uogewnikah S’loonskih korzdo sobota je przeznacono na sprzontanie
i uodrobianie zaleguos’ci z coukego tydnia.

Fto mo ih wiyncy, zacyno jurz w piontek po pouedniu. Jo tyrz tak zacon, bo trza bouo
umyc’ mojigo Yarisa po coukotygodniowym jerzdrzyniu. A rze zacon loc’ dysc, niy
musiou rzeh go puokac’, bo zrobiouy to za mie dyscowe krople.

Jesce ino skok do sklepu po spirytus, bo na uoknie jurz uod trzeh dni dohodzom na suon’cu, zasypane cukrym wis’nie, kere trza niym zaloc’, coby niy skisuy i coby przemiyniouy sie
w nojlepszy w Uogewnikah liker, kery tak rade smakujom wszystke oumy, no i jo.
Trza tyrz zrobic’ porzondek z gazetami, kere couki tydziyn’ cowieka gorszom doniysiyniami
z coukego s’wiata, a nojbarzij z administracyjnego cyntrum, z rzondu.

W sobota uod rana sprzontanie planowe.
Somsiadka pucuje uokno na plac i myje shody, bo na nia je dran.
Z wiyrhu shody wyciyro Krysia, kero mo zowdy woda z grin apfel, kerego s’wiyrzy zapah uoznosi sie na couki familok.

S’lubno uodkurzo dom, wyciyro i cos’ tam warzi.
Na mie wypaduo uozwiesic’ pranie za goorze, kere prauo sie couko noc w automacie.

Normalnie to planowou byh skok na uogroodek, kaj ceko na mie jesce reszta wis’ni
na gauyn’zi, bo te co som w spirytusie, to dopiyro piyrszy szub.
Ale rze jesce niy wyloz mi bool z plecoow po uostatniym srywaniu, to postanowiou rzeh zostawic’ ih troha dlo tyh, co ciyngiym przeuarzom przez pot na raub, przy tym go przewrocajonc, a troha dlo szpokoow.
Reszta co uostanie to bydzie dlo tyh co horujom na cuker, bo dieta ze szklonek je ponoc’ dobro na ta horoba.

Normalnie puszczou byh tyrz swoje tranzystorowe radio, bo jak przystowo na rasowego
uogrodkorza, w moji staryj laubie niy ma sztromu.
A co by leciauo? Radio Piekary!
I niy ino bez to, rze je lubia suhac’. Bo lubia.
Nojbarzij bez to, rze je wszyscy inksi puszczajom.
A coby niy bouo zamiyszanio w uogroodkowym eterze i mogua byc’ na uogroodkah peuno kuadrofonio, jo tyrz je puszczom.
Nojlepi sie je wtedy suho na gauynzi, bo mo sie niy ino tyn efekt kuadrofoniji, ale i inksze,
take jak poguos i falowanie dz’wiynku wedle kerunku z kerego wieje wiater.

A rze na uogrodek rzeh niy poszou, to zauoncou rzeh moje radyjko w doma, coby posuhac’
s’loonskego goodanio i granio z Piekarami.

Hyba mi sie palec pos’lizgnou, abo to bou palec borzy, bo zamiast Piekor uodezwauo
sie Radio Maryja.
Jurz rzeh hciou dostrojic’ fala, coby uodezwauy sie pobliske Piekary, a tu suysza suowa uo PIYRSZYM LIS”CIE S”WIYNTEGO PAWUA DO KORYNTIAN.

Godo sie w niym uo tym, coby my byli zgodni i niy bouo miyndzy nami rozuamoow,
coby my byli jednego duha i jednyj mys’li.

Rze prawdziwo mondros’c’ zapewni nom jednos’c’.

„Wytraca mondros’c’ myndrcoow,
a przebieguos’c’ przebieguyh zniwecza”.

A dali:

„Niy pisza tego, coby wos zawstydzic’,
ale coby wos napomniec’ - jako moje nojdrorzsze dzieci”.

i

„Wszystko mi wolno, ale niy wszystko przynosi korzys’c’.
Wszystko mi wolno, ale jo niczymu niy uoddom sie w niywola”.

Hytom pryntko za S’wiynte Pismo i cytom we wstympie uo tym rze bou uon napisany
skirz tego, rze w niydowno zauorzonyj gminie w Koryncie panowou niyporzondek
i nadurzycia.

Miou uon za zadanie i cel wprowadzynie porzondku tam kaj go brakowauo.

W mys’lah mom jesce tytuy z wcoraj wyciepniyntyh gazet z minionego tydnia:

„Kryzys w rzondzie? Po uodwouaniu ministra Lecha Kaczyn’skiego”.
„Szeremietiew do dymisje. Uciekajoncego promym do Szwecje Zbigniewa Farmusa ujynli
komandose”.
„Milijony uodpuynyuy. Dwie wielge afery zwionzane z uobrotym paliwami”.
„Prymier urlopuje ministra.( Hodzi uo Tomasza Szyszko ) po niyprawiduowos’ciah
na przetargah na telefonio UMTS”.
„Milijony do Wouomina. Z uoszukanyh s’loonskih przedsiymbiorstw”.
„Zadyszka zuotoowki”.
„Dolarowy zawroot gowy. Korupcjo, bezrobocie, afery”.
„Ranking cystyh ronk. Polska na 44 miejscu korupcyjnyj listy”.

STARCY ! DOS’C’ !

Trza pryntko szukac’ s’wiyntego Pawua coby napisou

PIYRSZY LIST DO WARSZAWIAN !