W mojih ukohanyh Uogewnikah S’loonskih dali pamiynto sie uo trzeh nojwarzniejszyh
s’loonskih sprawah, kere zacynajom się na „G”. Hoc’ niykerzy sie z tego pods’miywujom.

Uo Geldtagu, Gyburtstagu i Gyszynku.

Dlo wielu bouy to uokazje do uciehy i zabawy.

Nom uod prawie poou roku, te sprawy niy w gowie.

Ciyngiym wspominomy strata naszego Gerhacika i niy ino my.

W miniony piontek wspominali Go jego kamraty z uorkiestry, kerzy dali za Niego
i drugego muzykanta na mszo.

Przy muzykantah mys’li się uo muzyce, bo to je ih hlyb powszedni, dziynki kerymu
zarobiajom, abo dorobiajom pora groszy przy rostomajtyh uokazjah.
Dostowajom za to swooj Geldtag.

Teraz uokazjow je coroz mniyj.
Przez to i piniyndzy mniyj. Ale dlo swojih zmaruyh kamratoow ih niy szczyndzom.

Muzykantow u nos tyrz jurz coroz mniyj, ale Ci co som cieszom się powarzaniym i suurzom nom wszystkym swojymi talyntami.
Wielu z nih niy ino umi grac’, ale i fajnie s’piywac’. A granie i s’piywanie, to dz’wiynki
i pauze miyndzy niymi, kere skuodajom się na cauos’c’ utworu czy s’piywki.

Wszyscy zwrocajom uwaga na dz’wiynki, a dlo mie warzniejsze som pauze.

Te przekonanie mom po Uojcu, kerego tyrz rzeh wspominou dziyn’ po braciku, bo keby
rzou, miouby w tym dniu Gyburtstag.

A spomniou rzeh się Jego suowa, kere som w tytule tyj uosprowki wtedy, jak kapelonek
kery miou mszo za muzykantoow, poprosiou nos coby po wypowiedzianyj intyncji niy s’piywac’: „ wysuhej nos Panie” ino po cihu się porzykac’. Prosiou nos uo ciho modlitwa.
Uo skupiynie.
Uo PAUZA!

Niydoszuy vatrowy fajer miouby tradycyjny przebieg.
Kouocz, torta, abo inne suodke i kawa. Potyn jedyn za zdrowie. Uosprowka, wspominki,
po drugym ftos’ by zaproponowou coby douokouka stoua leciaua pies’niczka.

Uojciec by na pewno pociongnou: „Uogewske huopaki, to take uajdaki, bez dziouhoow niy umiom rzyc’..., a bracik by zas’piywou „ Na Banhof kulali kyjza, na Banhof kulali s’lydz’...”.

Oupa rod s’piywou: „Ros’nie cyprys ros’nie w donicy na uoknie...” abo „Mamulicko moja
cos’ mie wyhowaua, niywielas’ pociehy symie docekaua...”.

A przy szauocie zacynli by wymiyniac’ poglondy uo tym co je douokouka, a my muodsi zacynli by my politykowac’.

Ale jakby ftos’ z nos sie zagalopowou, wtedy Uojciec kon’cou zwada suowami:
„Ale teraz synek zroob poonkt!”.

Znaczouo to niy mniyj niy wiyncyj ino:
„skon’cz uosprawiac’ gupoty!”,
„niy uos’miyszej się!”,
„zastanoow sie co godosz, pomedytuj!”,
„ skon’cz zdanie, postow kropka i na tym poprzeston’!”.

Te mondre uojcowe powiedzynie zdowo się być’i dzisioj bardzo aktualne.
Ale niy ino w doomowyj uosprowce, ale w przedwyborczyj wrzawie.

Uod dwuh tydni przyuarzom do dom rostomajte ulotki, listy rekoomyndujonce kandydatoow
na posuoow i synatoroow, materiauy z hasuami i partyjnymi programami.

Zacon Janusz Steinhoff „Poseu Ziymi S’loonskiyj trzeh kadyndcjow”.
Tadeusza Donocika dali mi na naradzie w Urzyndzie Marszaukowskym, ale uon niy je
z mojigo uokryngu. Zmarnowali ino papioor.
Elegancko, w kopercie, przyszou zahwolany przez Wuodka Luban’skego - Józef Kubica.
Skon uon miou moja adresa?
Na Uobywatelskiyj Lorewadze stanou Janusz Kardasin’ski, „Normalny cowiek z normalnym pan’stwym”.
Ze zdjyn’cio szczyrzou do mie zymby Wojciech Szarama - prawnik, kery hce cobyh guosowou na prawo i sprawiydliwos’c’.
Na tricie lerzoy Jerzy Podsiadło, a na skrzynce na listy Lesław Jankiewicz, kerzy hcom
„przywroocic’ normalnos’c’ i wygrac’ przyszuos’c’”.
Synek mi przynioos Marta Świerniak z „mocnom klasom s’redniom, szansom dlo korzdego”.

Cytom to wszystko i analizuja naukowo wedle tego co uopublikowou profesor z Instytutu
Socjologiji.

Wedle dziewiyn’ciu przykozan’, kere godajom:

Idz’ i weluj! Jak welujesz jezes’ wolny! Rzodyn Cie niy zmusi cobys’ welowou na przekoor swojym przekonaniom.

Weluj som! Jak niy wiysz na kogo guosowac’ - idz’ po rozum do wuasnyj gowy.

Weluj politykoow, a niy swojih dubleroow! Parlamynt niy je reprezyntacjom publicznyj opiniji, ale reprezyntacjom politycznyj woli.

Weluj programy! Niy guosuj na tego kery nojgos’niyj wrzeszczy rze je z’le, ale na tego kery mo program poprawy, a jyj koszt je mniejszy uod zua kere jest.

Niy wiyrz wszystkym jednakowo! Wiyrz politykom, kerzi niy howajom przed Tobom gorzkiyj prowdy dlo siebie i wyjas’niajom jom uotwarcie, a niy wiyrz tym, kerzy
siebie ino hwolom.
Weluj sprawdzonyh! Weluj takih politykoow, kerzy jurz pokozali rze cos’ umiom.
Kerzy jurz cos’ uosiongnyli w swojih zawodah.

Weluj wiernyh! Jak rzes’ jurz wybrou partio, to welujn tyh politykoow kerzi jyj niy
zdradzom.

Niy uogloondej sie na sondarze! Jak Twoja partio stoji marnie w sondarzah, to niy
przenos’ swojego guosu na sondarzowyh lideroow, „coby niy stracic’ guosu” -
w demokracji niy ma straconyh guosoow, a guosujonc zgodnie z przekonaniym, zmniejszysz przewaga partji, kere som Ci uobce. Morze Twooj guos przewarzy szala?

Weluj uodpowiedzialnie! Polityka je niy ino praktykowaniym wolnos’ci, ale
i praktykowaniym uodpowiedzialnos’ci. I tak jak 23 wrzes’nio polityki uodpowiedzom za to, co zrobiyli i czego niy zrobiyli uod poprzedniego weloonku, tak po 23 wrzes’nio uobywatele bydom uodpowiadac’ za to, co tego dnia zrobiom.
Besto decyzje przy welowaniu muszom być’ rostropne.

Niykerzy kandydaci peuniom rola forhangoow, za kerymi je showany rostomajty bajzel
i maras .

A jaki to morze być’ maras, to nom pedziou jurz Mohandas Gandhi.

Wedug niego je ih siedym:

Bogactwo bez roboty.
Przyjymnos’c’ bez sumiynio.
Wiedza bez harakteru.
Handel bez etyki.
Nauka bez czuowieczyn’stwa.
Czes’c’ bez ofiary.
Polityka bez zasad.

Morze mielibys’cie jeszcze wiyncyj propozycji, ale jurz ta lista pobudzo do zastanowiynio.

A zastanowiac’ sie je nojlepi w ciszy.

Besto godom rozwrzeszczanym politykom, korzdymu z osobna:

ALE TERAZ SYNEK ZROOB POONKT !!!

Goodom to tyrz do korzdego z Wos !

To je mooj i uod moigo Vatra przedwyborczy Gyszynk.