Witejcie u Wos.
Dostoł żech oba majle i wiym, że to co jo żech zaproponowoł jes ciynżko zrobić. Bezco żech zaproponowoł alfabet oparty na czeskim pedziołżech w poprzednim majlu. Ale jes jedno jakim alfabetym bydymy pisać.
O tym, coby coś takiygo zrobić myślołżech jeszcze w szkole średnij, kiejżech znoł yno polski i ruski (po naszymu nauczyłżech sie jeszcze w doma). Być może było to na przekór polonistce ze Krzepic, co zawżdy godała, co ŚLONSKIJ GODKI NIY MA. Toch zawsze jij sie staroł pokozać, że niy mo racji. Chyba kaś we czwortyj klasie czytali my tekst po naszymu napisany takim dziwnym pismym co je nazywajom "transrypcja literowa" i to był piyrwszy roz co żech widzioł coś po ślonsku napisane.
Potym były studia we Gliwicach (elektronika) i Czynstochowie (informatyka). Nawet żech niy próbowoł godać tam po polsku, ale przynajmnij zech niy był sztuczny, choć niyzawsze mie rozumieli (szczególnie we Czynstochowie). W miyndzyczasie żech zaczon robić we Magistracie we Woźnikach (kaj miyszkom) i MUSIOŁECH nauczyć sie drab po czesku godać. Zajyno mi to kaś rok. Potym TRZA sie było uczyć po nymiecku, ale opanowołech go barzij we tekście niż we godce. Rok tymu podpisali my umowa ze gminom ze Słowacji i zaś trza sie było uczyć nowego jynzyka. Tako mom robota.
Kaś dwa lata tymu kumpel, co wtedy był bezrobotny, a dzisioj jes kiyrownikiym Zbiorów Ślonskich we Bibliotece Ślonskij we Katowicach wciongnon mie do pisanio o histori. Noprzód było to przepisywanie kroniki pisanyj bez farorza, potym protokołów Rady Miejskij (okres Staryj Polski). Tam tyż żech poznoł inksze słowa naszyj godki, dzisioj już zapomniane (np. posiedziciel - gospodarz). Potym zabrołech sie za starsze rzeczy. Do dzisiej żech napisoł już kaś 60 różnych broszur o moim mieście, głównie jako przepisanie i opracowanie starych tekstów ze ślonskich gazyt. (Nojstarsze polskie ze 1848, a niymieckie ze 1844) Pisza to w doma na komputerze, a potym kseruja w Magistracie na 30 sztuk. Dowom to tym ludziom, co ich to interesuje, do Bibioteki Ślonskij, do szkół i do bibliotek u nos. Niy sprzedowom tego yno bez to, że ludzi dzisiej niy stać, coby to kupić (tych co stać historia niy interesuje). Pisza to tak jak stoi w gazytach (niymieckie tłumacza, ale tyż niy na polski, yno na taki jak we starych ślonskich gazytach stoi). Do dziś przekopołech kaś 200 roczników różnych gazyt (bydzie tego kaś 15 tytułów). Robia to bez urlop, za swoje prywatne piyniondze. Ze Biblioteki Ślonskij i Magistratu mom błogosławiyństwo (zgodnie ze zasadom: jak ktoś coś robi, to mu niy przeszkodzać, a może tyż skorzystomy), ale piyniyndzy na to niy dostana. Przy okazji w tych starych szpargałach dokopołżech sie do różnych ciekawych rzeczy o histori Ślonska, co mie zawsze interesowało.
Bez co to wszysko pisza?
Jo już żech jes "stracony" do tego rodzaju roboty. Jesżech realistom, bezto sie niy obrażom na krytyka, bo to nic niy do. Wiym co pisanie w takim alfabecie co żech zaproponowoł jes trudne, ale ŻODYN w nim jeszcze niy próbowoł pisać (nawet jo, bo te pół strony co próbowołech pisać jakiś rok tymu sie niy liczy).
Wiym, że do celów internetu lepij jes pisać tak jak my sam piszymy. Ale niy idzie patrzeć yno na internet. Trza tyż bydzie drukować ksionżki i gazyty. Możes popatrzeć na strony Sorbów w internecie, kierzy używajom już taki alfabet. Abo na strony czeskie, czy słowackie. Tym alfabetym idzie spokojnie pisać nawet w internecie. Yno fakt, że żodyn jeszcze tego niy próbowoł.
Niy mom zamiaru uszczynśliwiać cołkiego świata. To nic niy do. Ludzi niy idzie uszczynśliwiać na siyła. Ludzie muszom sami chcieć coś zrobić. Do porażków już żech sie zdonżył przyzwyczaić. Jak wyjdzie mi jedyn pomysł na 1000 to i tak to jes już srogi sukces. Myślołżech w technikum o wprowadzyniu ślonskich piyniyndzy (nawet miołech przigotowane wzory banknotów), ale teroz w cołkij Europie bydom jednakie i mój pomysł niy mo już żodnego synsu. Myślołżech, coby zrobić ślonskie znaczki pocztowe, aż zech trefiył stare znaczki z okresu 1919-1922 z napisym "Górny Śląsk - Oberschesien - Heute Silesia". Coby przybliżyć ludziom historia Ślonska zaczonżech współpracować ze www.Slonsk.de , kaj we kalyndarium som moje (abo znalezione bezymie w starych gazytach) artykuły.
Pozatym richtig jes prowdom, że trza by spróbowac ułożyć już jakoś naszo godka. Jo żech niy jes jynzykoznawca (pisołżech praca dyplomowo na zlecynie z polonistyki, ale nic mi to niy dało; z resztom z medycyny tyż żech pisoł praca, a coby sie wyleczyć musza iś do lykorza). Uczyłżech sie na elektryka, elektronika i informatyka. Robia od 5 lot jako beamter. Jakieś trzy lata bawia sie historiom. Ktoś na internecie ciepnoł hasło: "trza robić testatura", to żech przesłoł to co już żech mioł kieś tam zrobione na tyn tymat. KOŻDY MO PRAWO TO KRYTYKOWAĆ. Tako jes demokracjo.
A z drugij strony - INACZYJ BY MY SIE NIE POZNALI.
Trzymej sie ciepło.
Pioter