W mojih ukohanyh Uogewnikah S’loonskih niyroz suysza te suowa modlitewnego zawouanio wtynczos, jak mi uciece fala piekarskego zyndra i uodezwie sie w mojym radioku Radio Maryja.

Corozki czyn’s’ciyj wyguoszajoom je tyrz, uopuszczone przez szczyn’s’cie, zdrowie abo robota - Uogewczany, kierujoonc je do Poonbooczka i inkszyh ludzi.

Przyznoom sie irze wy mie samy tyrz uod lot zbiyro sie potrzeba gos’nego zawouanio uo Miyuiosierdzie.

Niy dlo samego siebie, ale dlo uogewnickih bajtli.

A morze wszystkih s’loonskih bajtli?

W tyj sprawie adresatym moji pros’by uo Miyuosierdzie soom poloonisty. Niy Poonbooczek!

Ale zaczna uod poczoontku.

Niydowno`h wroociou z Mojoom z erhouloongu do swojih ukohanyh Uogewnik i starego Familoka za kerymi jurz Noom sie zacuo cnic’.

Przy uodstawianiu autoka do gararzu widza, irze rua uod rynny zas’ jest szfynkniono uod szlagoow kuloom, bo bajtle joom majoom za prawo torlata.

Mioue`h szczyn’s’cie. Prawie wylecieli na plac coby zagrac’ nowo wetka.

Trzeh mi sie nawinoouo pod rynka, bo wylecieli zza winkla. Reszta s’miotua jak mie uwidziaua.

Co wy tu robicie? Zapytou`eh - i zrobiou z coua warzbret. A potym kiwnou`eh pytajoonco gowoom ku korzdymu s’nih.

Jedyn wyksztusiou - „bede grac’ mecza”, drugi wystynkou - „byda grac’ w bala”, a trzeci -nojs’mielyj, bo miyszko zy mnoom na jednym sztoku uodpedziou - „bydymy grac’ fusbal panie Antku”.

Coch miou zrobic’?

Pohalou`eh ih po uebah ... i wyprostowou rua, coby torlata boua prosto.

Ale tyrz rzeh sie zamys’lou nad kepskymi rezultatami ih rehrotoow. I mojymi.

Bo przeca my wszystke, i uooni i jo, godoomy mimo nauki literackego jynzyka, kero`h jo skoon’czou, a uooni przebiyrajoom.

Ale jaki je tego rezultat?

To widac’, to suyhac’ to cuc’ - jak s’piywo sie w pies’niczce. A inkszo wspoomino uo trzeh przyjocielah z bojiska. Hciauo by sie coby takymi mogli uostac’.

A jak by im przyszuo zapisac’ to co wypedzieli, to jaki by to wygloondauo?
Szkodyn godyn - jak godali mooj Uojciec.

Historjo kerys’ juzas’ roz, w kolejnym pokolyniu, sie powtorzo.

Na s’loonski plac wyuarzoom bajtle po szes’ciu, siedmiu latah rodzinnyj edukacje,
w rostomajtyh waroonkah, uo inkszyh pozioomah wiedzy, znajoomos’ci jynzyku serca.

Idoom ku spouecznyj integracji przez placowe gracki, a za hwila przez wspoolno nauka
w szkole.

A s’loonsko szkoua uod lot, niyzmiynnie, niyzalerznie uod czasu i stosowanyh programoow, popeunio tyn soom buoond. Zapoomino uo ih roorznorodnos’ci na poczoontku tyj droogi.

Niy stosuje w swojym dziauaniu podyjs’cio procesowego - jak to sie teroski mondrze nazywo, skirz wprowadzanyh nowoczesnyh systymoow ih zarzoondzanio.

A kaj im do speuniynio norm ISO na tym polu?

Bo edukacjo, wyhowanie, wzrostanie i wrostanie w spoueczyn’stwo, to przeca soom procesa.

Jake soom dane wejs’ciowe do tyh procesoow? Rostomajte - szuo by uodpedziec’, hoc’by ino
na przykuadzie bajtli z mojego placu.

A ku czymu majoom te procesa prowadzic’?

Ku koompetyncji jynzykowyj! Ku kulturze. Jakiyj? Trudno uodpedziec’.
Pewnikym - europyjskyj.
Tako sie dzisioj suyszy prawie powszehnie uodpowiydz’. Poonos’ uoczekiwano.

Piyrszy bajtel morze pudzie ku polskiyj, hoc’ jurz na poczoontku mo uodcis’niynte placowe znamie.

Drugi bajtel morze uostanie przy s’loonskij koompetyncji jynzykowyj i kulturze - bo jest rodzinny, lokalny i niyciekawy s’wiata i uodleguyh kultur. A jak jurz - to przez media.

Trzeci bajtel morze bydzie hciou polyz’c’ ku niymieckyj koompetyncji jynzykowyj - bo uoon przeca jurz uodwiedzo w Unji Europyjskyj swoje stare Ciotki i Oonkloow.

A jak bajtle bydoom hcieli miec’ podwujno-, abo potrujno koompetyncjo jynzykowo?
Interesowac’ ih bydzie Kultura w coukos’ci?

Mogoom zdoonrzac’ nawet do wielokrotnyj koompetyncji jynzykowyj w procesie szkolnym.

Pod warunkym jednak, irze jest uoon do tego zdatny i niy bydzie powodowou u nih niepotrzebnyh zahamowan’ abo stawiou sztucznyh przeszkood.

A jak jest teroski w szkole na S’loonsku?

Soom moga cos’ na tyn tymat pedziec’, bo`h to przeszou i ciynrzko dos’wiadczou.

Bez to mys’la, rze to jurz nojwyrzszy czas poprawic’.
Dostosowac’ niyzbyndne narzyndzia do potrzeb tyh mauyh uczestnikoow nojwarzniejszego
w ih rzyciu procesu.

Niy morze na jego starcie byc’ ino elemyntorz z polskym abecaduym. Bo stowo sie foortkoom ino dlo piyrszego s’nih. Inksi soom uod tego momyntu przysztopowani.

Zakres udostympnianego ucznioom suownictwa musi przewidywac’ ih przyszue potrzeby
i oczekiwania.

Czy te wymogi speunio dzisioj szkoua na S’loonsku?

Korzdy wiy rze niy. Hoc’ uostatnio proobuje swoje braki zaklajstrowac’ lekcjami uo regioonie, gwarah, zwyczajah, s’loonskyj historji i kuhni.

To jednak niy wyroownuje momyntu startu. Przed inkszymi soom przeszkody abo uostowajoom uooni na starcie w doukah.

Korzde pokolynie s’loonskih dzieci uo polskym Doomie robi falstart.

Reszta hoc’ jest bez winy zostowo ze zadku. A przeca ih prawa poonos’ soom jednake?

Sposoob jest ino jedyn - prosic’ rehtoroow z klas poczoontkowego nauczanio uo Miyuosierdzie dloo Nih.

Przestac’ uooni muszom wahowac’ ino interesu jednyh, s’lyz’c’ im trza z wahy przy gwarah,
a stanoon’c’ przy jynzykah, uznanyh, zaakceptowanyh i zastosowanyh w tym nojwarznieszym dlo modego pokolynio procesie.

Trzeh roownoprawnyh jynzykah na edukacyjnym starcie dzieci na S’loonsku!

Jo uo Miyuosierdzie prosza i wouoom z mojih ukohanyh Uogewnik S’loonskih,
hoc’ wiym rze moga byc’ niydosuyszany, bo durzo warzniejszy i uo szyrszym duhowym wymiarze guos w sprawie Miyuosierdzio rozlego sie z inkszyh Uogewnik - krakowskih.