Tako informacjo uo hiyrarhiji warznos’ci, kero wszystkym niesie powodzynie i korzyści przywiooz rzeh uoonegdaj do mojih ukohanyh Uogewnik S’loonskih z Japoonie, kaj rzeh boou na szkolyniu, na co dzisioj niykerzy godajoom przeszpiegi.

Boou rzeh po nowe wiadoomos’ci i umiejyntnos’ci.

I mys’la rze przywiooz rzeh wtynczos recepta, wedle kery szuo sie stosowac’ i u nos.

A booua uoona tako jak widzicie na wiyrhu i pohodziooua uod inrzyniera Yamamoto, a tak rihtig to uod wszystkih Japoon’czykoow. Bo Uooni wszyscy sie doo niyj stosujoom i soom
z niyj radzi. Yamamoto ino Mi joom przekozou. Za darmo!

Noo niy caukym.

Hciou, coby Mu za to posuac’ przez kamrata podkoowa.

A rze niy ino u Palin’skego, naszego uostatniego gospodorza staryh podkoowoow boouo wtynczos pouno i na dodatek moja kamratka Basia miaua swoje „don’s’cie” do podkoowoow
u siebie w Nowym Bytooniu, toh sie zgodziou.

Jak we wolnym uod roboty czasie kosztowali my Ih sake, abo Santory Uiski, zrobioone
z ryrzu, to my sie Go pytali uo ta sprawa.

Tak noom joom wytuplikowou:

Nojwarzniejsze soom u Nih Kampanije - Przedsiymbiorstwa.

A to z tyj racje, rze dowajoom uoone robota takym jak Uoon - Yamamoto,
ale i poomogajoom inkszym jak trza, kerzy rzyjoom w Nippoonie - w Japooniji.

Wielu Japoon’coow, tak jak i inksze obywatele na coukiym s’wiecie narzeko na to, rze trza sie dzielic’ swojymi Jynami z inkszymi, kerzy rzyjoom w Nippoonie.

Tam przewarznie taki przeciyntny Yamamoto robi w jednyj Kampaniji uod poczoontku do kon’ca - do emerytury. Tak jak Jego Uojciec, za rehtora we wiejskiyj szkole, uod kerego moom rzyczynia dloo Nos po japoon’sku.

Ale rozumi tyrz to, rze jak by niy dej Borze Jego Kampaniji sie niy wiooduo, to znojdzie
poomoc i uopieka Nippoonu. I dziynki niyj przetrwo do czasu, arz znojdzie nowo robota
w inkszyj, lepszyj Kampaniji.

Inno rzecz, rze zdarzo sie rzodko coby ftos’ musiou tam miynic’ robota, ale niykerym uod czasu do czasu sie to zdarzo.

Tak po prowdzie, Yamamoto mo na utrzymaniu i Kampanijo i Nippoon, ale Uone za to organizujoom i sprzedowajoom jego robota i zabezpieczajoom jego byt i bezpieczyn’stwo.

I tak rihtig ino po to Uoone tam soom. Bo soom urzyteczne dloo Niego!

Uoonymu sie werci to rze jest na uostatku tyj uznowanyj przez siebie hiyrarhie warznos’ci!

Dowo Mu uoona pewny zarobek, poczucie bezpieczyn’stwa i ryalno poomoc w potrzebie.

Bez to Uoon uoo Nie dbo jak nojlepi poradzi. I jeszcze radzi zastosowac’ ta hiyrarhio inkszym Norodoom.

Na Nippoon, na zabezpieczynie wzajymnyh interesoow i wspoolnyh celoow, tak jak wszyndzie - puaci podatki.

Przyznocie, rze za tako rada podkoowa sie nolerzaua - podkoowa na szczyn’s’cie.

Hciou joom skirz tego, rze miaua uoona Mu przypoominac’ lata nojwiynkszyj s’wiytnos’ci
Nippoonu, kedy wzorami dlo wszystkih byli samuraje.

Wzoor wszelkih Cnoot i Hoonoru.

Wojowniki, kere bouy zwyrtne niy ino w fehtunku na miecze, ale i wytrwaue w jez’dzie na kooniah, na keryh przemiyrzali swooj Nippoon.

Kooni jurz tam u nih jest jak na lykarstwo, morze ino w jakyms’ ZOO. A podkoow niy idzie znos’c’ wcale. Nawet na szczyn’s’cie.

Bez to tyn symbol samurajoow i Ih kooni w postaci podkoowy, miou być’ dloo niego talizmanym i potrujnoom pamioontkom:
po samurajah, Ih kooniah i poo Nos - znajoomyh ze S’loonska.

Idzie zrozumiec’ ta Jego nostalgio.

Jak nasz Prezydynt, kery wczes’niyj boou elektrykorzym w Stoczni Gdan’skiyj, tyrz pojehou
do Japoonie, to pomys’lou`eh rze Mu uo tym tyrz pedzoom. Ale s’cic’ z jakegos’ powodu Mu
tyj recepty niy dali, bo hoc’ guosioou, rze bydymy budowac’ u Nos Drugo Japoonio, to hyba
niy dostou na Jyj tymat coukego know-how.

Szkoda, bo miou przeca wielke morzliwos’ci coby joom tyrz u Nos zastosowac’.

S’cic’ Jo jednak miou u Nih wiynksze zaufanie.

Ale co z tego?

Komu ino rzeh moog, to`h ta prowda przekazowou. Ale mauo kery Mie suhou.

Nawet jeszcze we uostatnie wybory samorzoondowe rzeh uo tym przypoominou i proobowou
w koouko tyj recepty zebrac’ zwolynnikoow, kerzi by hcieli sie jyj poddac’ i joom zastosowac’. Darymnie!

Hasuo na tyn tymat wprowdzie wydrukowali Mi „bytoomske Wspoolniki” na przedwyborczyj wizytoowce ze zdjyn’ciym, ale do programu sie wcale niy przyuorzyli.

A jak wlez’li w koalicjo z SLD, to hyba sie musieli go wyrzec. Bo poonos’ walka
z bezrobociym niy booua zadaniym Gminy.

Dziepiyro teroski, po stracoonyh latah, jak jurz je kole 20 procynt bezrobotnyh, zaczynajoom
cos’ wszyscy szukac’ i proobowac’ robic’. Ale jurz jest na niykere sposobnos’ci za niyskoro.

Dobry momynt i sposobny czas jurz noom wszyskym uciyk. Uciykuo tyrz wiela uokazjoow
i morzliwos’ci. Przysuowiowe „piyn’c’ minut” minoouo.

Nastympne jak Toyota ze swojoom fabrykoom, tyrz przeca z Nippoonu, s’wiyrzo co jak noom s’miootua spod nosa.

A szkoda.

Pojawiooua sie jednak nowo nadzieja dlo niykeryh!

Na razie w postaci nowego podatku. Dobrowolnego. Jak z recepty Yamamoto.

Czy zbiyrac’ Go bydoom na zapuacynie nowyh recept?

Podkoowoow pewnikiym za nie niy weznoom, bo u Nos sie przeca puaci Zuociokami i uod niydowna Euro.

Na razie niy wiadoomo, jake uobowioonzki i zadania hce za Nos wzioon’c’ na siebie za tyn dobrowolny podatek nasz nowy NIPPOON?

Jake mo recepty? Za co by hciou pijoondze?

Jak by dobrze Noom surzoou, to szuo by je puacic’.

Idoom nowe wybory, to sie wszystkego dowiymy!

A potym ino uostanie skalkulowac’ - czy sie to bydzie wercic’?!

Hyba rze zadecydujoom zas’ za Nos!