Mocno rzeh sie przejoon sytuacjoom modyh, jak rzeh usuyszou Farorzowe suowa, rze
w mojih ukohanyh Uogewnikah S’loonskih niy ma ani jednyj pory, kero by hciaua pon’s’c’
do kos'cioua po s’lubnym kobiyrcu we Borze Narodzynie.

Takiyj sytuacje poonos’ jeszcze u nos niy boouo.

No ale co tu durzo godac’. S’cic’ modzi niy majoom perspektywy, abo soom mauo zaradni.

Tako prosto recepta niczego niy tumaczy, ani rzodnego niy zadowolo.

Pomys’lou rzeh, rze trza by cos’ na to zaradzic’. Bo przeca tyn problym moge i mie dopas’c’.

Prawie dostou rzeh zaproszynie uod Bartka do Stolarzowic na spotkanie z modymi.
Nadarzaua sie dobro sposobnos’c’, coby sie miyndzy modymi uozgloondnoon’c’.

Kohane Stolarzowice to przeca nojblirzszo mojih ukohanyh Uogewnik czyn’s’c’ zieloonego S’loonska, kaj wielu z naszyh przodkoow szukauo w przeszuos’ci swoji s’lubnyj.

Zaradnyj, gospodarnyj, czystyj i szwarnyj. Takiyj, kero miaua starczyc’ ze swojoom miyuos’cioom na couke rzycie.

To uoo Nih przed laty wszyscy s’piywali zgodnie na festiwalu: „Te Uopolske dziouhy...”.

Zdauo by sie Ih pora w naszyh Uogewnikah, coby zaradzic’ tymu niyhlujstwu, brzydocie
i zgorzkniauos’ci kawaleroow, keryj pouno na korzdym kroku.

Wsiod rzeh w swoja landara i pojehou.

Jurz na granicy, kaj pod droogoom przepuywo strumyk z Uogewnickego Rowu, uozgloondnou rzeh sie dobrze, czy niy dojrza tu jaki frelki abo kawalera na zolytah.

Mostki czynsto surzouy modym na spotkania, bo przepuywajoonco pod niymi woda us’wiadoomiaua im upuywajoony czas i poonaglaua w decyzjah, a szum wody zaguszou przed niypowouanymi uszami suowa, kere bouy przeznaczoone ino dlo uszoow zolytnikoow.

Ale tukej rzodnego niy bouo. Noo bo widac’, wszyscy jurz zapomnieli uo tym, rze tu jest mostek, dobre miejsce na shadzki.

W Stolarzowicah niy wskurou rzeh wiela, bo sie uokozauo, rze my w Uogewnikah soom dlo Ih dziouhoow nazbyt spoloonizowane.

Troha rzeh sie dziwiou tymu, bo jeszcze w uszah mi dz’wiyn’czaua wiadoomos’c’ uo zolytah
i zapowiedziah, na kere poonos’ dali modzi ze bytoomskego Lwowa i z Recklinghausen, czy na uopah?

Symbolym Ih uczuc’ tyrz jest Most.

Most stowarzyszyniowy, po kerym wybiyrajoom sie modzi po s’lubie do Europy.

Ale tyrz tymczasowy dah nad spoloonoom niydowno saloom baletowoom Opery S’loonskiyj, kery poonos’ mo być’ Ih wspoolnym wianym.

Bo tyn wyniosuy, w ksztaucie parabole dah, wznosi sie wysoko ponad dotyhczasowo puaskos’c’ jego spoloonego poprzednika, tworzoonc w s’rodku nowo przestrzyn’ do zagospodarowanio.

Szczyn’s’cie w niyszczyn’s’ciu.

A rze zrynkowiny miauy być’ pouoonczoone z dniym uotwartym Opery i syminarium pos’wiyncoonymu polsko-niymieckiyj kulturze muzycznyj S’loonska, toh sie tam na nie wybrou.

Ale niystety, rzodnyj nowyj przestrzyni intelektualnyj rzeh tu niy znod. Nawet w dyskusji,
keryj organizatorzy niy przewidzieli.

Prelegynty pedzieli to, za co Im zapuacoono i wszyscy sie rozeszli.

A w prelekcjah te same stare banauy i slogany, poza jednoom nowinkoom, rze sprawcoom poprawy bytu artystoow lwowskiyj Opery po wypyndzymiy Ih ze Lwowa, boua libsta uod Aleksandra Zawadzkiego, kery po wojnie bou wojewodoom s’loonskym.

I co mi bouo robic’?

Pojehou rzeh na „Zolyty” we familoku.

Do Miejskego Os’rodka Kultury w Rudzie S’loonskiyj. Naprzeciwko „Huty Pokooj”.

Na wodewil w dwuh aktah wierszym w Jynzyku S’loonskym na motywah „Ożenku”
Mikołaja Gogola.

Mimo ruskego piyrwowzoru, tukej przestrzyn’ dloo S’loonzokoow znod rzeh wiynkszo nirz pod parabolicznym dahym-mostym w bytoomskiyj Operze, mimo rze Uona nosi przeca miano - S’loonsko!

Tu rzeh trefiou na rados’c’ z przebywanio w atmosferze prowdy.

Tu „Gorol - Alfons Patryk von Skarpeta - handlowiec” - w tyj roli Jacenty Jędrusik, boou dwoojnasoob prawdziwy.

A tak sie przedstawiou pannie na wydaniu:

„Kochanieńki, ja ze Lwowa
I pół życia o tym marzę
Aby gadać w śląskiej gwarze
Alfons Patryk von Skarpeta
Eksport, import, hurt i detal
Obuwnicze artykuły
Buty, lacie, trampki, szuły”.

Tu za przyczynoom librecisty Mariana Makule i kompozytora Grzegorza Spyry, poznou rzeh nowo „pora, co dobrze uorze” s’loonsko gleba kulturalno.

Tukej tyrz znod rzeh przeciwwaga dlo tak zwanyj „kultury górnośląskiej”, tworzoonyj przez jarmarczny „przemys rozrywkowy” na fali syntymyntalnyh potrzeb S’loonzokoow.

W tym miejscu moog rzeh sie hihrac’ coukym soboom, boh niy musiou suhac’ biydolynio Artystoow nad swojoom doloom.

Znod dobro rozrywka, s’loonski humor i pies’niczki z przedniym, wysmakowanym wykoonaniym.

Tu tyrz rzeh zrozumiou prowda, rze nojwiynksze szanse w zolytah mo kawaler, kery jest magistrackym byamtrym.

„Jorg Ciapała - kawaler, urzyndnik magistracki” tak zahwolou swoja pozycjo spoueczno:

„Czas uoznajmic’ to jurz s’wiatu
Rze czuowiekym nojwarzniejszym
Jest urzyndnik magistratu
Niy robotnik przy maszynie
Ani wsiowy hop przy pugu
Niy artysta przy pianinie
Lecz urzyndnik we ancugu! „

Trza naszym hopcoom dac’ szansa.

Szykujmy NASZYH BYAMTROOW !

Czasu uostauo niywiela!